Тэрміны. Што і ў якія тэрміны робіцца?

Чаму многія вэб-студыі зацягваюць праекты і як пазбегнуць гэтага

У замоўцаў часта ўзнікаюць пытанні, кшталту, “чаму так доўга сайт робіцца” альбо “чаму вы абяцалі зрабіць за два месяцы, а зрабілі за тры” – паспрабуем коратка адказаць на гэтыя пытанні. Разгледзім сайтабудаванне па этапах, якія даводзіцца праходзіць, каб атрымаўся якасны рэзультат. Такім чынам, каб стварыць сайт трэба паслядоўна вырашыць наступныя задачы:

1) спраектаваць блок-схему сайта (1-2 тыдні),

2) адмаляваць дызайн па створанай блок-схеме (2-3 тыдні),

3) звярстаць гатовы дызайн (2 тыдні),

4) запраграмаваць адмінку на сайт і нацягнуць на яе вёрстку (3 тыдні).

Такім чынам, цягам 9 тыдняў (два месяцы), замоўца атрымае гатовы сайт з прадуманай структурай, ідэальным дызайнам, кросбраўзернасцю і адсутнасцю багаў (канешне, сайты бываюць рознай складанасці і, адпаведна, большым ці меншым часам на працу, але мы разглядаем самы распаўсюджаны варыянт – карпаратыўны сайт). Але гэтыя тэрміны - ідэальны варыянт.

Амаль кожны замоўца чамусці не давярае прафесіяналам і лічыць, што ведае лепш, куды і як будуць глядзець карыстальнікі ды што іх найперш зацікавіць на сайце. Таму, калі дызайнер прапануе на разгляд блок-схему, замоўца можа “папрасіць” перадвінуць “гэты блок сюды, а гэты зусім прыбраць”. А кожнае выпраўленне цягне за сабой іншыя выпраўленні, каб завязаць усе іншыя элементы ў лагічную структуру, што непазбежна займае яшчэ 1-2 дня. Тым часам, калі справа тычыцца дызайна, замоўца можа раптам высветліць, што “чырвоны колер не падабаецца майму сабаку” ды “ці не маглі б вы зрабіць тут больш экспрэсіўную анімацыю” – яшчэ n-дзён дадатковых на працу.

Вось і атрымліваецца, што чым больш замоўца ўмешваецца ў працу, тым больш расцягваецца праца. Абараніцца дамовай у выканаўцы таксама не атрымліваецца, бо дасылаць кожным разам на зацвярджэнне кожны крок - значыць губляць яшчэ 3-5 дзён. Таму, і памнажаецца час кожнай працы на 2 – і два месяцы пераўтвараюцца ў 4-5.